اوّلی ءُ گُڈّی کاگد مھر ءِ نام ءَ
!مہرُل
من امیت کناں کہ تو وش ءُ جوڈے ءُ مہروانیں زندے گوازینگ ءَ ئے…
من شہداد شاد آں۔ بلے اگاں شہداد ناشاد ءِ کنے اوں رَد نہ بیت…!
منی واہگ ات کہ من اے کاگد ءِ بنداتی ءَ مہر ءُ دوستی ءِ بابت ءَ چیزے دانک نبشتہ بہ کناں بلے چوش کہ تئی نام وت مہر انت ءُ پدا منی دل ءَ ترا چہ گیشتر کس مہر ءَ سرپد بوت نہ کنت۔ اگاں کسّے چہ ترا گیشتر مہر ءَ سرپد انت گڈا آ سومری انت.
چہ سومری ءِ نام ءِ گرگ ءَ منا دو بند یات اتک کہ:
سمّو ہمراہ انت سومری یانی
شوانگ ءُ راہ گولیں مری یانی
منا اے شعر پرچہ یات اتک اشی ءِ مطلب ءَ تو الّم سرپد بئے۔
گڈا گپ ایش انت کہ من مہر ءُ دوستی ءِ بابت ءَ گپ نہ کناں بلے تہنا دو لبز گُشاں کہ " اگاں کسّے ءِ یات ءَ کسّے ارس شلیت گڈا آ ارس نہ انت بلکیں 'مہر' انت۔
ترا منی ءُ منا تئی زانگ ءَ باز وھد انت ءُ من ءُ تو یکّیں دومی ءِ اندر ءَ جوانیں رنگے ءَ سرپد انت۔ اگاں منی ءُ تئی نیام ءَ چیزے پہ مدامی پشکپتگ ات گڈا آ تئی بچکندگ، تئی گپ کنگ ءِ وھد ءِ داب، تئی بینگیں لُنٹانی لپرزگ ءِ کندگ ءُ زند ءَ یکرندے ترا امبازاں زورگ ءُ گریوگ…!
ھاھاھا من چونیں گنوکیں واہگ داراں.. من گنوکے آں گندے ءُ پدا تو وت برے برے اے گپّانی سرا کند اتگ ءُ گُشتگ کہ شاد تو پھک ءَ گنوگے یے…
من آ روچی تئی اے گپ مسکرا زرتگ انت بلے مرچی تئی گپ راست انت من گنوگے آں…
نوں باریں ترا یات کنت یا ناں بلے منا ہما ساہت انگت ءَ انچُش انت کہ پورا اے دمانے ءَ پیسر من اے ساہتانی تہا گوازگ ءَ اتاں…
! مہر
تو زانے داں روچے مرچی منا کجام گپ چو تیر ءِ وڑا دل ءَ لگّ ایت ؟
ترا یات بیت یکرنے تو گُشتگ ات کہ منا تو سک دوست بوتگے من ترا گُشت نہ کتگ… من ترا جُست کہ گڈا چے بیتگ؟ انی گشت بس ھلاس…! تو جواب دات کہ "نہ وھد چہ دست ءَ لگوشتگ"…
اے گپ باریں روچے چُنت رند ءَ منی دل ءَ کئیت ءُ من وتی اندر ءَ چہ وت بیگواہ باں… گُشنت کہ انسان ءَ را ءِ وھد ءَ کلمہ ءَ یاد کنت ءُ وانیت بلے مناں کلمہ باریں یاد بیت کہ ناں بلے تئی اے پسّہ من دلجماں کہ منا یات بیت…
مہری! ہرچ انسان ءِ ہمے واھش بیت کہ آئیارا آئیے وڈیں مردمے بہ رسیت… آئیے ھیالاں ، واہشاں، بزّگی آں ءَ سرپد بہ بیت… مرچی من اے گپّاں اے کاگد ءِ منّت ءَ گُشاں کہ آ مردم توئے کہ من شوھازگ ءَ بوتگاں… بلے وائے قسمت ....!
پُلّیں امروز نہ شُت
مئے گل ءُ بال شُتاں
انسان چینچو بے وس ءُ بزّگ ءُ ڈالچار انت اے زالمیں دنیائے دیم ءَ من کندگ ءَ آں… بلے اے کسّہ اد ءَ آسر نہ بیت بلکیں بندات بیت…
اگاں کسّے ءِ یات ، زہیر ءُ مہر بیھال کنگ بوتیناں گڈا بگندے من اے درست کاگدے ءَ پتاتگ اتاں ءُ گنگاہ ءَ دور داتگ انت بلے ………
چونائی ءَ من کاگد نبیسگ ءِ ھالت ءَ نئیتاں بلے پہ زور دل ءَ را پہ مجبوری گپت ءُ آؤرت ءُ نبیسگ بندات کُت…
ترا رُخصت نہ کناں کہ رخصت کنگ ءَ پد کسّہ ھلاس بیت ءُ من اے کسّہ ءَ ہچبر ھلاس کنگ نہ لوٹاں……!
بچکنداں باتے…!
Comments